Die Schule Braunwald ist nicht nur Thema an der Gemeindeversammlung, sie ist auch Thema in der ersten Sage im FRIDOLIN-Sagenkalender 2025. Hier ein Auszug. Wer die ganze Sage lesen will: Der Fridolin-Sagenkalender 2025 kostet 37 Franken und kann ab sofort hier bestellt werden oder auch schriftlich bei Fridolin Druck und ­Medien AG, Rathausgasse 22, 8750 Glarus, Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein.

«Än afrikanischi Republigg: Sit Urziite git’s im Glaarnerland d Landsgmei und sit es paar Jaare chunnt allpott es Kamerateam oder es paar interessierti Schurnalischte uf Glaris, zum uss erschter Hand z erläbe, we mir Glaarnerinne und Glaarner mindered und meered. So isch au d Mavis Kisima uss dr Demokratische Republigg Kongo i ds Glaarnerland chu. Sie hät als Korreschpondäntin für Radio Okapi bbrichtet und hett irnä Landslüüt öppis über d Glaarner Demokratie sölle verzelle.

Aber si isch uusgrächnet a d Gmeindsversammlig vum 18. Novämber 2021 z Schwande ggange. Das isch die Versammlig gsii, wo d Linteler gägete Hochwasserschutz gschtimmt händ, will’s nüd emal d Schtei vum Bruuwalder Entwässerigsschtolle händ welle. Wo dr Chäpp Luchsiger i sinere Galle übere schlächt Umgang vu de andere Südler mit de Bruuwalder gseit hät, mi chennti meine, Bruuwald sig e Republigg in Afrika, isch das für d Mavis gad ds richtig Stichwort gsii – wil mit afrikanische Republigge hät si sich beschtens uusgkännt. 

Wo si dä im «Adler» nuch bi-me-ne Pier ghogget isch und dr eint oder ander Gmeindraat ire probiert hät z erkläre, was da gad vorgfalle sigi, hät si gfunde, vilicht sigis mit dr Glaarner Demokratie nüd eso wiit här, we mä im Kongo meini, und garäment sig mä ja em Fuess vum Ortschtogg mit en ere eigete Republigg besser draa as mit Nachpuure we de Linteler, wo meined, si bruuched eim nüd. Jedefalls isch si glii drüberabe äme schüne Wintertaag mit ihrem Schatz, das isch e lupereine Aawalt uss Züri gsii, uff Bruuwald und hät gfunde, das es ire dett nuch piess. Fascht dr ganz Gemeindraat hät glii drüberabe möse guu – und dr Tiis, dr Dani, dr Chäpp und dr Frigg sind sant irne Familene uff Bruuwald, wo dr Hansheiri schu gwont hät. 

D Mavis isch dä glii schwanger worde, und wil d Schuelleitig gfundä hät, mi mös d Bärgschuel z Bruuwald zuetue, wän nüd emal mi füüf Chind dett obe siged, hät si mit irem Schatz beratä, we me das chennti verhindere. D alt-Gmeindräät händ ere zwar ekä Hoffnig gmacht, aber d Mavis hät z Züri unde gworbe, und schu bald isch de eint oder de ander vu irne Schwöschtere mit irem Gschpuusi uff Bruuwald zoge. Etz mosch wüsse, dass z Afrika Chind ebä as Riichtum vunere Famili gälted, und eso sind z Bruuwald obe bald ganzi Schaare vu Goofe umegchrasmet. Wo aber d Schuelbehörde dr Leerer glich uff Lintel abe befolä händ, hät d Mavis gfunde, etz sigi’s Ziit. Zäme mit de-n-alt-Gmeindräät und de-n-Urnerbödler händ si d Bruuwalder vum Räschtglaarnerland loosgseit und ä Republigg nach em Modäll vu dr Demokratische Republigg Kongo ggründet. Wil z Afrika chasch ebe uss jedem Dorf e Republigg mache, das schtaat so i dr Verfassig … » 
FJ

Link zur Onlinebestellung: Wie es ausgeht? Der Sagenkalender 2025 mit der ganzen Sage kann hier bestellt werden.